الأربعاء، 19 مايو، 2010

تاج زهرة ...... تاج رحيق


بسم الله الرحمن الرحيم
احبابي في الله
وصلنى هذا الاسبوع تاجين من الاخت زهرة الاسلام وهو بعنوان ( التاج السلطاني ) وتاج آخر من الاخت مي - رحيق الورد - وهو تاج سياسي بعض الشيئ .
وتقديراً مني لهما وشكراً لمجهودهما قبلت هذه الهديه منهما متنمياً الله ان يوفقني في اجابه التاجين معاً في هذا البوست.
ونبدأ أولاً بالتاج الاول وهو تاج ( زهرة الاسلام ) بعنوان ( التاج السلطاني )

بأسم الله نبدأ
- التاج السلطاني -
قوانين التاج السُلطاني كالآتي:

اذكر اسم من طلب منك حل هذا الواجب .
تحدث عن ستة أسرار قد لا يكتشفها من يقابلك للمرة الأولى .
حّول هذا الواجب إلى ستة مدونين، واذكر أسماءهم مع روابط مدوناتهم في موضوعك .
اترك تعليقًا في مدونة من حّولت الواجب عليهم؛ ليعلموا عن هذا الواجب .
.......................................................

1- اسم من حول هذا التاج : زهرة الاسلام

2- الاسرار السته :
- السر الاول :
انه بالرغم من جديتي في الحياه التى توحي بأني صارم إلا انني اعشق الرسم وكتابه الشعر وهي من اعظم هواياتي .
- السر الثاني :
اني حالم المشاعر للدرجه التى تجعلني اهتم بتربيه اسماك الزينه و زراعه الزهور في منزلي .
- السر الثالث :
اتجاهاتى الفكريه ... بالتأكيد لن يعلمها احد من أول مقابله .
- السر الرابع :
انني اخفي دموعي في احلك الظروف والشدائد مما يعتقد البعض بأنني صلب المشاعر .
- السر الخامس :
اننى انوي ان اصبح رمزاً من رموز هذه الامه.
- السر السادس :
احتفظ به لنفسي .


3 - تحويل هذا الواجب لسته مدونين :
لن احوله لأحد حتى لا انسى احد من احبابي ، بالاضافه انه هناك بالفعل الكثيرين من المدونين الذين اعرفهم اجابوا على هذا التاج .

( في ختام التاج اشكر اختى زهرة الاسلام على هذا التاج الطيب .... شكراً جزيلاً .)

...........................................

والان مع التاج الثاني وهو تاج سياسي - ربنا يستر - من الاخت مي ( رحيق الورد )

بأسم الله نبدأ
- تاج سياسي -

1- الانتخابات كلمة بتثير اشمئزاز البعض وسخرية البعض الاخر(بنتكلم فى مصر)...طيب انت ايه احساسك وانت بتسمع الكلمة دى؟...انا عن نفسى بارجع !
عندما تقترب الانتخابات اتذكر روايه ( البؤساء ) للكاتب الفرنسي فيكتور هوجو ، حيث بدأ روايته بهذه الجمله
( طالما توجد لامبالاة وفقر على الأرض ، كتب كهذا الكتاب ستكون ضرورية دائما )

2- من اولى ابتدائى ولحااااااااد الجامعة ...عمرك شاركت فى انتخابات اتحاد الطلاب ؟... وعمرك رشحت نفسك فى الانتخابات دى ؟ وحصل مرة وكنت حاجة فى اتحاد الطلاب ؟
بفضل الله تم ...... في المرحله الابتدائيه كنت من اعضاء النشاط الديني والنشاط الفني بالمدرسه وفي المرحله الاعداديه كنت مقرر اللجنه الفنيه وفي المرحله الثانويه كنت مقرراً للجنه الرياضيه وفي المرحله الجامعيه طلبت منى احدى الاسر الطلابيه ان انزل على قوائم مرشحيها لأنتخابات اتحاد الطلاب بالكليه .

3- تعرف ايه عن مصر غير ابوتريكة وحسنى مبارك ؟
اعرف النيل – الوجوه الطيبه – المسجد الازهر – القلب النقي - ............

4- ايه رايك فى كلا من ( مفيد شهاب - فتحى سرور- علاء مبارك وجمال مبارك - احمد عز- ايمن نور- محمود اباظة ) ؟
- مفيد شهاب : من ألمع خبراء القانون وهو الذي شارك في وضع قانون حبس الصحافيين وقانون الارهاب – ترزي قوانين كبير .
- فتحي سرور : من اكبر وأشهر ترزيه القوانين في مصر فهو يشرف على القوانين التى تضمن بقاء السادة ، ولكن الشهاده لله هو رجل يتمتع بحكمه شديده ودهاء وخبره سياسيه كبيره جداً جعلته يحتوي البرطمان المصري ..... عفواً أقصد البرلمان المصري بكافه نشطائه مع اختلافهم ( الحزب الوطني – الاخوان المسلمين – التجمع – الوفد – الغد – المستقلين ) .
- علاء مبارك : رجل يعمل في الظل وأراح وأستراح .

- جمال مبارك : لا يعرف عن مصر سوى ملاعب الجولف وشرم الشيخ والفور سيزون .
- أحمد عز : من اقرب المقربين لجمال مبارك ويساعده بماله لبلوغ السلطه .
- ايمن نور : حاول الوصول ولكن حيل بينه وبين غيره .... ومازال يحاول .
- محمود اباظه : بيفكرني بالبشوات بتوع الافلام ، معارضه بلا انياب .

5- النكتة دى ضحكتنى (واحد محشش قاعد قدام باب بيته ، مر عليه أحدهم وسأله: إنت من أهل البيت ؟ قاله: لأ.... أنا من كفار قريش ! )...ضحكتك؟
ايوه ضحكتني ....شكراً

6- ياترى انت متخيل انك ليك دور فى انتخابات الشورى والشعب والرئاسة ولا انت موقن ومتاكد تماما انك زى باقى المصريين بطييييييييييخة؟....من غير زعل يعنى كلنا بطاطيخ...!
لا طبعاً انا مش بطيخ ... وبفضل الله امتلك بطاقه انتخابيه واشارك بشكل منتظم في العمليه الانتخابيه واقول الحق في اختياري وحتى وان لم ينتصر الحق فكفاني فخراً انني ايجابي امام الله وامام نفسي .

7- هوووووو ايه اللى لم الشامى ع المغربى؟ مااااال الحزب الوطنى ومااال الشيوخ بتوع قناة الناس وباقى الفضائيات؟ وفتاوى اطاعة ولى الامر شايفها ازاى؟ وشايفانا مجتمع مدنى ولا لسه بدرى علينا شوية؟
أولاً : قناه الناس قناه جيده ومش كل الشيوخ اللي فيها بيساعدوا أولي الامر الفاسدين .
ثانياً : اي رجل دين بيساعد أولي الامر الفاسدين بيفكرني بفيلم الزوجه التانيه لما حسن البارودي كان شيخ القريه وكان بيقول لشكري سرحان علشان يطلق مراته ويجوزها العمده ( طلق يا أبو العلا ..... واطيعوا الله ورسوله وأولي الامر منكم ) .


8- قللللللبك اسود؟....لسه شايل وكاتم؟....تعمل ايه لو قابلت حد ضربك وانت صغير قلم متنسهوش؟
الله يسامحه مش خلاص الوقت فات وكنت صغير .


9- لو جاتلك عروسه افكارها نفس افكارك ...مبادئها نفس مبادئك...توجهاتها هى بالظبط توجهاتك ..بس مفيش معاها فلوس...تتجوزها؟

مش مهم { إن يكونوا فقراء يغنهم الله من فضله }


10-انت فاشل ؟ ولا ناجح ؟... يعنى ايه فشل ونجاح فى مصر؟
بفضل الله ناجح واستمتع بنجاحي ، ولا اقتنع بشيئ اسمه فشل بل هي تجارب ونتائج واذا حصلت على نتيجه غير مرضيه أقوم بالتعلم من الخطأ واعاده المحاوله ( شغل تنميه بشريه بقى )
ولكلاً منا تعريف النجاح الخاص به في مصر وفي اي مكان في العالم .


( في ختام التاج أشكر اختى مي على هذا التاج الذي استمتعت بأجابته )
.............................................
اتمنى ان اكون وفقت في اجابه التاجين وجزيتم خيراً على حسن المتابعه
محمد

هناك 15 تعليقًا:

الحب الجميل يقول...

السلام عليكم ورحمة الله وبركاته

مبروك عليك التاجين

أسمحلى بأول زياره لى فى المدونه

وأدعوك لزيارة مدونتى

كل الاحترام والتقدير

(ست* جنى* الحسن) يقول...

سلامو عليكو..
كلامك دمه خفيف يامحمد وواقعى اوى واحييك عليه.
ولكن...
هى الحقيقة فى مصر بقت تضحك كده؟؟؟
وعجبى.
لك تحياتى

زهرة(جنى)الاسلام يقول...

السلام عليكم
مبروك التاجين
بس ياريت تعديل التاج التانى لان كبير اوى

مي يقول...

اشكرك جدا جدا يا محمد بجد اجاباتك فوق الروعة غير انها بتفتح لنا افاق جديدة وبجد كانت صريحة جدا
لالالالالا أنت لازم تدينا دروس فى الـتنمية ألبشرية كتير
عشان نتعلم لغة الحوار الهادف
بجد اجابة التاجين تنم انك شخص رائع ومبدع


(ياريت تبقى تكتب عن تربية اسمك لزينة لانى عندى رغبة بس حاسة انى مش هعرف اهتم بيها )
شكرا لك جداااااااااااا ياصديقى
تحياتى

ليله شتاء يقول...

السلام عليكم ورحمة الله وبركاته

******
تربية الاسماك الزينة وزراعة الزهور من اروع الهوايات

*******
أما عن التاج السياسي

عن الانتخابات ( في مصر ) حدث ولا حرج !!!!!!!!!

تحياتي

بنت مصر يقول...

لايق عليك التاج يا محمد

ربنا يوفقك وان شاء الله تكون رمز ايجابي في هذه الأمة مادام عندك الاصرار على النجاح

تحياتي

زهور الامل يقول...

ماشاء الله عليك يا محمد
ربنا يكرمك يارب ويوفقك

اجاباتك كلها جميلة وعجبتني جدا

انت جاوبت بعقلانية كبيرة اوي

تقبل مروري

MOHAMMED ELBANNA يقول...

الحب الجميل
وعليكم السلام
نورتيني بالزياره واتشرف بزيارتك في مدونتك ان شاء الله .
محمد البنا

MOHAMMED ELBANNA يقول...

ست الحسن
وعليكم السلام
ربنا يبارك فيكي وكلك ذوق .
شرفتيني .
محمد البنا

MOHAMMED ELBANNA يقول...

زهرة الاسلام
الله يبارك فيكي .
اشكرك على مرورك الطيب .
محمد البنا

MOHAMMED ELBANNA يقول...

مــي
ربنا يبارك فيكي ، كلك ذوق وانتى الاروع واحنا اللي بنتعلم منك يافندم.
اشكرك على ردك الطيب وزيارتك التى دائماً تسعدني .
نورتنيني
محمد البنا
طريق النجاح

MOHAMMED ELBANNA يقول...

ليله شتاء
مرحباً بزيارتك الاولى .
شكراً على الرد الطيب .
محمد البنا

MOHAMMED ELBANNA يقول...

بنت مصر
مرحباً بزيارتك .
تسعديني بمرورك الدائم .
محمد البنا
طريق النجاح

MOHAMMED ELBANNA يقول...

زهور الامل
ربنا يبارك فيكي
اشكرك على ذوقك الراقي في الرد .
محمد البنا

غير معرف يقول...

ماااااااااااااا شااء لله هذا جميل